విధి రాసిన బంధం ❤️ – 5

బెడ్‌రూమ్‌లో ఫోన్ అలారం మోగుతూనే ఉంది. దుప్పటి కప్పుకుని పడుకున్న మాలిని మాత్రం దాన్ని ఆపే ప్రయత్నం కూడా చేయలేదు. కాసేపటికి మళ్లీ అలారం మోగడంతో విసుగ్గా ఫోన్ తీసుకుని ఆపేసింది.

ఇంకా కొద్దిసేపు పడుకోవాలనిపించినా, ఈరోజు తన ఫ్రెండ్స్‌తో కలిసి బయటకు వెళ్లాలని ముందే ప్లాన్ చేసుకుంది. వెంటనే లేచి కిటికీ తెరిచి బయటకు చూసింది.

కింద పార్కింగ్‌లో తన కారు కనిపించగానే ఫోన్ తీసుకుని ఫ్రెండ్‌కి కాల్ చేసింది.

హలో నేహా… మనం అనుకున్న షాపింగ్‌కి ఈరోజు వెళ్తున్నాం కదా?

అవునే. నేను రెడీగా ఉన్నాను. నువ్వు ఎప్పుడు వస్తావు?

ఒక గంటలో వచ్చేస్తాను. కానీ ముందు ఒక కాఫీ తాగాలి. నిన్న రాత్రి నిద్ర సరిగ్గా పట్టలేదు.

అయితే త్వరగా రా. మనం షాపింగ్ అయిపోయాక కొత్తగా ఓపెన్ చేసిన కేఫ్‌కి వెళ్దాం.

సరే. కలుద్దాం.

ఫోన్ పెట్టేసి మాలిని బాత్రూమ్‌లోకి వెళ్లింది.

కాసేపటికి తయారై కిందికి వచ్చింది. డైనింగ్ టేబుల్ దగ్గర సత్యనారాయణ పేపర్ చదువుకుంటూ కూర్చున్నాడు. సుజాత పనివాళ్లకు వంటగదిలో ఏవో సూచనలు ఇస్తోంది.

అమ్మా… బ్రేక్‌ఫాస్ట్ రెడీనా? నాకు కొంచెం లేట్ అవుతోంది.

అంత తొందరగా ఎక్కడికి వెళ్తున్నావు? ముందు కూర్చుని తిను అని సుజాత చెప్పింది.

షాపింగ్‌కి వెళ్తున్నాను అమ్మా. నేహా వాళ్లు వెయిట్ చేస్తున్నారు.

రోజూ షాపింగ్, ఫ్రెండ్స్‌తో బయట తిరగడం తప్ప ఇంకేమైనా పనులు ఉన్నాయా నీకు? పేపర్ పక్కన పెడుతూ సత్యనారాయణ అడిగాడు.

డాడీ… మళ్లీ మొదలుపెట్టకండి. నాకు నచ్చినట్టు కొంతకాలం ఉండనివ్వండి.

రోజూ ఏదో ఒక ప్రోగ్రామ్ ఉంటూనే ఉంటుంది నీకు. ముందు వచ్చి కూర్చో. నీతో ఒక విషయం మాట్లాడాలి.

ఏంటో చెప్పండి డాడీ.

మాలిని కుర్చీలో కూర్చుని ప్లేట్‌లో టిఫిన్ వేసుకుంది.

సత్యనారాయణ పక్కనే ఉన్న కొన్ని ఫైల్స్ ఆమె ముందు పెట్టాడు.

ఇవి మన కంపెనీలకు సంబంధించిన వివరాలు. మనకు హైదరాబాద్‌లోనే కాకుండా ఇతర ప్రాంతాల్లో కూడా బిజినెస్‌లు ఉన్నాయి. వాటిలో ఒకటి నీకు అప్పగించాలని అనుకుంటున్నాను.

మాలిని ఫైల్స్ తెరిచి చూసింది.

ఏంటి డాడీ? నన్ను ఆఫీస్‌కి వెళ్లి కూర్చోమంటున్నారా?

ఆఫీస్‌కి వెళ్లి కూర్చోవడం కాదు. అక్కడ జరిగే పనులన్నీ నువ్వు చూసుకోవాలి. మేనేజ్మెంట్ ఎలా జరుగుతోంది, కొత్త ప్రాజెక్ట్స్ ఏంటి, కంపెనీని ఇంకా ఎలా అభివృద్ధి చేయాలి అనేది నేర్చుకోవాలి. నీకు చదువు ఉంది. వ్యాపారం గురించి కూడా తెలుసుకోవాలి కదా.

నాకు తెలుసు డాడీ. కానీ నాకు వేరే ఆలోచన ఉంది.

ఏంటది?

నాకు ఒక ఫ్యాషన్ స్టూడియో ప్రారంభించాలని ఉంది. నా సొంత డిజైన్స్‌తో ఒక బ్రాండ్ తీసుకురావాలి. ఫ్యాషన్ షోలు నిర్వహించాలి. కొత్త డిజైనర్స్‌కి అవకాశం ఇవ్వాలి. నా పేరు మీద ఒక గుర్తింపు రావాలి.

సత్యనారాయణ నవ్వుతూ కూతురివైపు చూశాడు.

మనకు ఇప్పటికే ఇన్ని కంపెనీలు ఉన్నాయి. వాటిలో ఒకదాన్ని నువ్వు చూసుకుంటే నీకంటూ ఒక బాధ్యత ఉంటుంది. మళ్లీ కొత్తగా ఇవన్నీ ఎందుకు?

అదే డాడీ… మీ కంపెనీల్లో నేను పని చేస్తే అది మీ పేరు మీద ఉంటుంది. మీ వ్యాపారాన్ని నేను చూసుకుంటున్నానని అంటారు. కానీ నేను ఏదైనా కొత్తగా ప్రారంభిస్తే, నా కష్టంతో ఒక స్థాయికి చేరుకుంటే, అది నా గుర్తింపు అవుతుంది కదా!

సుజాత కూతురి మాటలకు తల ఊపింది.

తనకు ఏదో చేయాలనే ఆశ ఉంది కదండీ. ఒక అవకాశం ఇవ్వండి. మొదట చిన్నగా ప్రారంభించనివ్వండి.

సత్యనారాయణ కాసేపు ఆలోచించాడు.

సరే. నీకు నచ్చినట్టే చెయ్యి. కానీ ఏ పని చేసినా దాని మీద పూర్తి బాధ్యత తీసుకోవాలి. మధ్యలో ఆసక్తి పోయిందని వదిలేయకూడదు.

అది మాత్రం జరగదు డాడీ. ఈ విషయంలో నేను చాలా సీరియస్‌గా ఉన్నాను.

అయితే నీ ప్లాన్స్ అన్నీ సిద్ధం చేసుకో. ఎంత బడ్జెట్ కావాలో, ఎక్కడ ప్రారంభించాలో వివరంగా చెప్పు. మన వాళ్లతో మాట్లాడి ఏర్పాట్లు చేద్దాం.

మాలిని ఆనందంగా తండ్రిని కౌగిలించుకుంది.

థాంక్యూ డాడీ! మీరు ఒప్పుకుంటారని నాకు తెలుసు.

అది సరే కానీ, ఈరోజు ఎక్కడికి వెళ్తున్నావో చెప్పలేదు కదా? సుజాత అడిగింది.

షాపింగ్‌కి వెళ్తున్నాను మమ్మీ. ఆ తర్వాత ఆదిత్యకి కాల్ చేస్తాను. ఈ మధ్య అసలు సరిగ్గా మాట్లాడటం లేదు వాడు.

ఆదిత్య పేరు వినగానే సుజాత నవ్వింది.

మీ ఇద్దరికీ చిన్నప్పటి నుంచి ఇదే అలవాటు. ఒకరితో ఒకరు మాట్లాడుకోకుండా ఒక్కరోజు కూడా ఉండలేరు.

అది వేరు మమ్మీ. వాడు నా బెస్ట్ ఫ్రెండ్. వాడితో మాట్లాడకుండా నాకు ఏదోలా ఉంటుంది.

అంటూ మాలిని తన గదిలోకి వెళ్లిపోయింది.

కొద్దిసేపటి తర్వాత అద్దం ముందు నిలబడి తయారవుతూ ఫోన్ తీసుకుంది. ఆదిత్య ఫోటో కనిపించగానే తెలియకుండానే ఆమె పెదవులపై చిన్న నవ్వు వచ్చింది.

చిన్నప్పటి నుంచి వాళ్లిద్దరి మధ్య మంచి స్నేహం ఉంది. స్కూల్ రోజుల్లో ఒకే చోట చదువుకున్నారు. కాలేజీలో వేర్వేరు చోట్ల చదివినా వాళ్ల స్నేహం మాత్రం తగ్గలేదు.

మాలిని ఏదైనా సమస్యలో ఉంటే ముందుగా గుర్తొచ్చేది ఆదిత్యనే. ఆదిత్యకి ఏదైనా విషయం చెప్పాలనిపించినా ముందుగా ఫోన్ చేసేది మాలినికే.

అయితే మాలిని మనసులో ఆ స్నేహం కంటే ఎక్కువైన భావన ఉంది.

ఆదిత్య తనకు ఎంత ముఖ్యమో ఆమెకు తెలుసు. కానీ తన మనసులోని మాటను ఇప్పుడే చెప్పాలని అనుకోవడం లేదు. ముందుగా తనకంటూ ఒక స్థానం సంపాదించుకోవాలి. తన కలను నిజం చేసుకోవాలి. ఆ తర్వాతే ఆదిత్యతో తన మనసులోని మాట చెప్పాలని నిర్ణయించుకుంది.

ఇంతలో ఫోన్ మోగింది.

స్క్రీన్ మీద ఆదిత్య పేరు కనిపించింది.

హలో మేడమ్… ఈరోజు ఏమైనా తీరిక ఉందా? అవతలి నుంచి ఆదిత్య గొంతు వినిపించింది.

ఎందుకు? నన్ను కలవాలని ఉందా?

అబ్బో! నీకు అంతకంటే వేరే పని ఉండదా? అని ఆదిత్య నవ్వాడు.

నాకు చాలా పనులున్నాయి. అయినా నీకోసం టైమ్ తీసుకోవాల్సిందే కదా!

సరే అయితే మధ్యాహ్నం కలుద్దాం. నీ ఫేవరెట్ కేఫ్‌కి వస్తావా?

వస్తాను. కానీ ఈరోజు బిల్ నువ్వే కట్టాలి.

అది ఎప్పుడూ ఉండేదే కదా!

మాలిని నవ్వుకుంది.

సరే. మధ్యాహ్నం కలుద్దాం.

ఫోన్ పెట్టేసిన తర్వాత కూడా ఆమె ముఖంలో నవ్వు అలాగే ఉంది.