ఢిల్లీ నగరంలోని ఒక అత్యంత విలాసవంతమైన ఫైవ్ స్టార్ హోటల్ బోర్డ్ రూమ్ అది. ‘జేఎస్ గ్రీన్ ఎనర్జీ ప్రాజెక్ట్’కు సంబంధించిన అంతర్జాతీయ ఇన్వెస్టర్లతో జరిగిన అత్యంత కీలకమైన కాన్ఫరెన్స్ ఇప్పుడే ముగిసింది. ఐదు వేల కోట్ల రూపాయల భారీ ప్రాజెక్టుకు సంబంధించిన తుది సంతకాలు పూర్తయ్యాయి. జేఎస్ కార్పొరేషన్ చరిత్రలోనే ఇదొక సువర్ణ అధ్యాయం. ఈ మీటింగ్‌కు శక్తి స్వయంగా హాజరయ్యాడు. భార్య జ్వాల అనారోగ్యం నుండి కోలుకుని బిజినెస్ బాధ్యతలు చూసుకుంటున్నప్పటికీ, ఈ అంతర్జాతీయ డీల్‌ను తానే స్వయంగా పూర్తి చేసి, ఆమెకు ఒక అపురూపమైన కానుకగా ఇవ్వాలని శక్తి భావించాడు.
మీటింగ్ ముగిసిన వెంటనే శక్తి తన పర్సనల్ లాయర్ శివరామ్‌ను హోటల్ లాంజ్‌లోకి పిలిపించాడు. శక్తి ముఖంలో అలసట ఉన్నా, కళ్లల్లో ఒక విజయం తాలూకు సంతోషం స్పష్టంగా కనిపిస్తోంది.
