New Katha Varnika is now on Google Play — read Telugu stories on your phone. Learn more
విధి రాసిన బంధం ❤️ – 4

విధి రాసిన బంధం ❤️ – 4

 

 

ఉదయం ఎనిమిది గంటలు అవుతోంది.

 

రామ్మోహన్‌రావుగారి ఇంట్లో అప్పుడే హడావుడి మొదలైంది. వంటగదిలో సావిత్రి, పద్మ, వసంత ముగ్గురూ పనులు చేసుకుంటున్నారు. డైనింగ్ టేబుల్ దగ్గర పిల్లల పుస్తకాలు, ఫోన్లు చెల్లాచెదురుగా పడి ఉన్నాయి.

 

పద్మ దోసెలు వేస్తుంటే వసంత పిల్లలకు లంచ్ బాక్సులు సిద్ధం చేస్తోంది.

 

దీప్తి అప్పుడే నిద్రలేచి వంటగదిలోకి వచ్చింది.

 

అమ్మా, నాకు టిఫిన్ త్వరగా పెట్టు. కాలేజీకి టైమ్ అవుతోంది అంది.

 

రోజూ ఇదే మాట. నువ్వు త్వరగా లేస్తే నీకు టైమ్ సరిపోతుంది కదా అని పద్మ నవ్వుతూ అంది.

 

అది విన్న శ్రావణి కూడా నవ్వింది.

 

నవ్వడం కాదు, నువ్వు కూడా త్వరగా తయారవ్వు. నీకు కూడా కాలేజీ ఉంది అని వసంత గుర్తుచేసింది.

 

అంతలో రోహిత్ వచ్చి డైనింగ్ టేబుల్ దగ్గర కూర్చున్నాడు.

 

అమ్మా, నాకు దోసెలు వద్దు. ఈరోజు పూరీలు చేయలేదా? అని అడిగాడు.

 

నిన్ననే చేశాను కదరా. రోజూ నీకు నచ్చినవే చేయాలా? అని వసంత అంది.

 

సరే, ఏది ఉంటే అది పెట్టు అని రోహిత్ ఫోన్ పక్కన పెట్టాడు.

 

అందరూ తమ తమ పనుల్లో ఉండగానే ప్రభాకర్, మధుసూదన్ కూడా అక్కడికి వచ్చారు. ఇద్దరూ ఆఫీసులో జరగాల్సిన పనుల గురించి మాట్లాడుకుంటున్నారు.

 

రామ్మోహన్‌రావుగారు వచ్చి కూర్చోగానే ప్రభాకర్ నిన్నటి వ్యాపార వివరాలు చెప్పడం మొదలుపెట్టాడు.

 

అన్నయ్యా, కొత్త బ్రాంచ్ పనులు దాదాపు పూర్తయ్యాయి. ఇంకో రెండు రోజుల్లో ప్రారంభించవచ్చు అన్నాడు.

 

మంచిది ప్రభాకర్. ప్రారంభోత్సవానికి కావాల్సిన ఏర్పాట్లు కూడా చూసుకో. ఎక్కడా తొందరపాటు ఉండకూడదు అని రామ్మోహన్‌రావుగారు చెప్పారు.

 

మధుసూదన్ కూడా కొన్ని లెక్కల గురించి మాట్లాడాడు. రామ్మోహన్‌రావుగారు అన్నీ విని అవసరమైన సూచనలు ఇచ్చారు.

 

అప్పుడే ఆదిత్య అక్కడికి వచ్చాడు.

 

ఏంటి నాన్నా, అప్పుడే ఆఫీస్ విషయాలు మొదలుపెట్టేశారా? అని నవ్వుతూ కూర్చున్నాడు.

 

నువ్వు కూడా త్వరగా వచ్చి కూర్చుంటే నీతో కూడా మాట్లాడొచ్చు కదా అని రామ్మోహన్‌రావుగారు అన్నారు.

 

ఇప్పుడే వచ్చాను నాన్నా. ముందు కాఫీ ఇవ్వమని అమ్మకు చెప్తాను అన్నాడు ఆదిత్య.

 

సావిత్రి వెంటనే కాఫీ తీసుకొచ్చి ఇచ్చింది. ఆదిత్య తల్లితో ఏదో సరదాగా మాట్లాడుతూ కాఫీ తాగాడు.

 

ఇంట్లో అందరూ ఒకరితో ఒకరు ఇలాగే చనువుగా ఉంటారు. రామ్మోహన్‌రావుగారికి ఇద్దరు తమ్ముళ్లు. పెద్ద తమ్ముడు ప్రభాకర్, చిన్న తమ్ముడు మధుసూదన్. ప్రభాకర్ భార్య పద్మ, వారి పిల్లలు కిరణ్, దీప్తి. మధుసూదన్ భార్య వసంత, వారి పిల్లలు రోహిత్, శ్రావణి.

 

సావిత్రి ఈ పిల్లలందరికీ పెద్దమ్మ. వాళ్లు కూడా ఆమెను ఎంతో ప్రేమగా చూసుకుంటారు. ఆదిత్య వాళ్లందరికీ అన్నయ్య. అందుకే ఇంట్లో ఎవరికి ఏ సమస్య వచ్చినా ఆదిత్య దగ్గర చెప్పుకుంటారు.

 

కాసేపటికి కిరణ్ కూడా వచ్చి పెద్దనాన్నతో ఆఫీసుకు వస్తానని చెప్పాడు.

 

అందరూ టిఫిన్ ముగించుకుని తమ పనుల్లోకి వెళ్లిపోయారు.

 

అప్పుడే సావిత్రికి తన అన్నయ్య సత్యనారాయణ ఫోన్ గుర్తొచ్చింది.

 

ఏమండీ, నిన్న మా అన్నయ్య ఫోన్ చేశారు. ఈ ఆదివారం అందరం వాళ్ల ఇంటికి రమ్మన్నారు. చాలా రోజులైంది వెళ్లి అంది.

 

వెళ్దాంలే సావిత్రి. అందరినీ కలిసి కూడా చాలా రోజులైంది అని రామ్మోహన్‌రావుగారు చెప్పారు.

 

మా వదిన సుజాత కూడా మాట్లాడింది. మాలిని ఈ మధ్య బిజినెస్ పనుల్లో బిజీగా ఉంటోందట. తనకంటూ ఒక ఫ్యాషన్ స్టూడియో ప్రారంభించాలని చూస్తోందట అంది సావిత్రి.

 

మాలిని చిన్నప్పటి నుంచి సావిత్రికి చాలా ఇష్టం. సావిత్రి అన్నయ్య సత్యనారాయణ, వదిన సుజాతల ఒక్కగానొక్క కూతురు. వాళ్ల కుటుంబానికి ఆస్తిపాస్తులు బాగానే ఉన్నాయి. సత్యనారాయణగారు రియల్ ఎస్టేట్, హోటల్ వ్యాపారాల్లో మంచి స్థాయిలో ఉన్నారు.

 

మాలిని కూడా సంపన్న వాతావరణంలో పెరిగింది. విదేశాల్లో చదువుకుంది. ఆధునిక దుస్తులు, ఖరీదైన కార్లు, షాపింగ్, స్నేహితులతో ప్రయాణాలు అంటే ఇష్టం. తనకు నచ్చినట్టుగా ఉండే స్వభావం ఆమెది. తల్లిదండ్రులు కూడా ఆమెను చాలా గారాబంగా పెంచారు.

 

సావిత్రి కాసేపు ఆలోచించి భర్తతో ఒక విషయం చెప్పాలనుకుంది.

 

ఏమండీ, ఆదిత్య పెళ్లి గురించి మనం కూడా ఆలోచించాలి కదా అంది.

 

రామ్మోహన్‌రావుగారు ఆమె వైపు చూశారు.

 

మా అన్నయ్య కూతురు మాలిని ఉంది కదా. ఆదిత్యకు ఆమెను ఇచ్చి పెళ్లి చేస్తే బాగుంటుందని నా కోరిక. మనకు తెలిసిన కుటుంబమే. మాలిని కూడా మన ఇంట్లో అందరితో కలిసిపోయి ఉంటుంది అంది సావిత్రి.

 

ఆదిత్యకు కూడా ఇష్టముండాలి కదా సావిత్రి అని ఆయన అన్నారు.

 

అది నిజమే. ముందు వాడితో మాట్లాడతాను. మా అన్నయ్యతో కూడా ఈ విషయం మాట్లాడాలని ఉంది అంది.

 

అంతలో ఆదిత్య అక్కడికి వచ్చాడు. చివరి మాటలు విని, ఏంటి అమ్మా, నా పెళ్లి గురించి అప్పుడే చర్చలు మొదలయ్యాయా? అని నవ్వాడు.

 

సావిత్రి కూడా నవ్వుతూ, మొదలుపెట్టక ఇంకెప్పుడు మొదలుపెట్టాలి నాన్నా అంది.

 

ఆదిత్య మాత్రం ఇప్పుడే పెళ్లి గురించి ఆలోచించడం లేదని చెప్పి ఆఫీసుకు బయలుదేరాడు.

 

వాడు వెళ్లిన తర్వాత సావిత్రి భర్తతో, వాడికి ఇప్పుడే పెళ్లి మీద ఆసక్తి లేదనుకుంటాను. అయినా నెమ్మదిగా మాట్లాడితే ఒప్పుకుంటాడులే అంది.

 

రామ్మోహన్‌రావుగారు ఏమీ మాట్లాడలేదు. భార్యకు తన మనసులో ఉన్న మరో విషయం చెప్పాలని అనిపించినా ఆగిపోయారు.

 

హారిక పరిస్థితి ఆయనకు గుర్తొచ్చింది. శేషయ్య కూతురికి మంచి జీవితం ఇవ్వాలని మనసులో అనుకున్నారు. ఆ అమ్మాయి భవిష్యత్తు గురించి తీసుకోవాల్సిన నిర్ణయం చిన్నది కాదు.

 

సావిత్రి మాత్రం తన అన్నయ్య కూతురు మాలిని గురించి ఆలోచిస్తూ ఉంది.

 

ఆదిత్య పెళ్లి విషయంలో తాను అనుకున్నదే జరగాలని ఆమెకు ఉంది. కానీ రామ్మోహన్‌రావుగారి మనసులో ఉన్న ఆలోచన గురించి ఆమెకు ఇంకా తెలియదు.

 

ఆ ఇంట్లో అందరికీ తెలియకుండానే రెండు వేర్వేరు ఆలోచనలు మొదలయ్యాయి.

 

ఇంకా ఉంది…