వలపు మధురిమ 4 min read

వలపు మధురిమ – 3

గాయత్రి చేతిలో ఉన్న ఫోన్ వైపు చూస్తూ విరాన్ష్ కొన్ని క్షణాలు ఏమీ మాట్లాడలేదు.

ఆ ఫోటోలో విరాన్ష్ పక్కన నిల్చున్న అమ్మాయి నవ్వుతూ ఉంది. వాళ్లిద్దరి మధ్య ఉన్న క్లోజెనెస్ చూస్తే… అది కేవలం కాలేజ్ ఫ్రెండ్షిప్ కాదని గాయత్రికి అర్థమైంది.

విరాన్ష్… ఆమె ఎవరు?

విరాన్ష్ నెమ్మదిగా కుర్చీలో కూర్చున్నాడు.

నా కాలేజ్ లవ్.

గాయత్రి గుండె ఒక్కసారిగా బరువెక్కింది.ఆ మాట వినాలని ఆమె అసలు అనుకోలేదు. అయినా తెలుసుకోవాలనే బాధ మరింత పెరిగింది.

పేరు?

విరాన్ష్ కాసేపు మౌనంగా ఉండి చెప్పాడు.

అన్విత.

గాయత్రి ఫోన్‌ను టేబుల్ మీద పెట్టింది.

మీరిద్దరూ నిజంగా ప్రేమించుకున్నారా?

అవును.

అయితే నన్నెందుకు ప్రేమించావు?

ఆ ప్రశ్నకు విరాన్ష్ వెంటనే సమాధానం చెప్పలేదు. ఎందుకంటే అన్వితతో ఉన్నది నా గతం గాయత్రి. నువ్వు నా వర్తమానం మాత్రమే కాదు… నా భవిష్యత్తు.

గాయత్రి కళ్లలో నీళ్లు తిరిగాయి.

మాటలు వినడానికి బాగానే ఉన్నాయి విరాన్ష్. కానీ నా మనసులో ఒక ప్రశ్న మాత్రం అలాగే ఉంది. ఆమెను అంతగా ప్రేమించిన నువ్వు… ఆమెను ఒక్కసారిగా ఎలా వదిలేశావు?

విరాన్ష్ కళ్లలో కాలేజ్ రోజులు మెదిలాయి.

మొదట్లో అన్విత అంటే నాకు ప్రపంచం. కాలేజ్‌లో ప్రతి రోజు ఆమెతోనే ఉండేవాడిని. కాంటీన్‌లో ఒకే టీ షేర్ చేసుకోవడం నుంచి, లైబ్రరీలో పక్కపక్కన కూర్చోవడం వరకు… మా చిన్న ప్రపంచం మాదే అనిపించేది.

అతను చిన్నగా నవ్వాడు.

అప్పుడు నాకు తెలియదు… అదే ప్రేమ ఒక రోజు నాకు భయంగా మారుతుందని.

ఎప్పుడు మారింది?

నేను ఆమె నుంచి దూరంగా ఉండాలని మొదటిసారి అనుకున్న రోజు… నా ఫ్రెండ్‌కి ఆమె ఫోన్ చేసి, నాతో మాట్లాడొద్దని బెదిరించింది.

గాయత్రి షాక్ అయింది.

అంతేకాదు. నా ఫోన్ చెక్ చేయడం, నా మెయిల్స్ చూడడం, నా ఫ్రెండ్స్‌ని గమనించడం… ఇవన్నీ మొదలయ్యాయి. నేను ఆమెను వదిలేస్తానేమో అన్న భయం ఆమెకు పిచ్చిగా మారిపోయింది.

మరి నువ్వు?

నేను మాట్లాడి మార్చాలని ప్రయత్నించాను.

విరాన్ష్ వాయిస్ నెమ్మదించింది.కానీ ఒక రోజు ఆమె చేసిన పని మాత్రం నేను ఎప్పటికీ మర్చిపోలేను. గాయత్రి అతని వైపు చూసింది.

ఏం చేసింది?

విరాన్ష్ సమాధానం చెప్పబోతుండగానే అతని ఫోన్ మోగింది. స్క్రీన్‌పై ఒకే పేరు కనిపించింది. అన్విత.

విరాన్ష్ ఫోన్‌ను వెంటనే సైలెంట్ చేశాడు.

గాయత్రి ఆ పేరు చూసింది.

ఇంకా ఆమె నీ జీవితంలోకి ఎందుకు వస్తోంది?

విరాన్ష్ ఆమె చేతిని పట్టుకున్నాడు.

ఎందుకంటే నేను ఆమెను వదిలేసినా… ఆమె నన్ను వదల్లేదు.

అదే సమయంలో మళ్లీ ఫోన్‌కు మెసేజ్ వచ్చింది.

ఈసారి ఫోటో కాదు.

కాలేజ్ క్యాంపస్‌లో విరాన్ష్, అన్విత కలిసి ఉన్న మరో పాత ఫోటో.

దాని కింద ఒక చిన్న మెసేజ్.

నన్ను ఎందుకు వదిలేశావో గాయత్రికి చెప్పావా విరాన్ష్?

గాయత్రి ఆ మెసేజ్ చదివి అతని వైపు చూసింది.

విరాన్ష్ ముఖంలో ఒక్కసారిగా ఆందోళన కనిపించింది.

ఎందుకంటే ఆ తర్వాత వచ్చే ప్రశ్నకు సమాధానం చెప్పడం అతనికి అంత సులభం కాదు.

అన్వితతో తన ప్రేమ ఎలా ముగిసిందో కాదు…

ఆ ప్రేమ ముగిసే ముందు తాను చేసిన ఒక నిర్ణయం గాయత్రికి తెలియదు.

గాయత్రి కళ్లలోకి నేరుగా చూడలేక విరాన్ష్ తల దించుకున్నాడు.

“నువ్వు ఏం దాచావు విరాన్ష్?”

కొన్ని క్షణాల నిశ్శబ్దం.

“అన్వితతో నా ప్రేమ ముగిసే ముందు… నేను ఒక నిర్ణయం తీసుకున్నాను.”

“ఏ నిర్ణయం?”

విరాన్ష్ నెమ్మదిగా తలెత్తాడు.

“ఆమెను పెళ్లి చేసుకోవాలని.”

గాయత్రి ఒక్కసారిగా నిశ్చేష్టురాలైంది.

“ఏంటి?”

“అవును గాయత్రి. కాలేజీ చివరి రోజుల్లో మేమిద్దరం పెళ్లి చేసుకోవాలని నిర్ణయించుకున్నాం. ఇంట్లో వాళ్లకి చెప్పకుండా… రిజిస్టర్ మ్యారేజ్ చేసుకోవాలని కూడా అనుకున్నాం.”

గాయత్రి కళ్లలో నీళ్లు చేరాయి.

“అయితే?”

“ఆ రోజు నేను ఆమెను కలవడానికి వెళ్లాను. కానీ అక్కడ జరిగిన విషయం నా జీవితాన్నే మార్చేసింది.”

“ఏం జరిగింది?”

విరాన్ష్ గొంతు వణికింది.

“అన్విత నా దగ్గరికి ఒక వీడియో తీసుకొచ్చింది. అందులో నేను ఆమెతో చేసిన ప్రైవేట్ సంభాషణలు, మా ఫోటోలు అన్నీ ఉన్నాయి. నన్ను పెళ్లి చేసుకోకపోతే వాటిని అందరికీ పంపిస్తానని బెదిరించింది.”

గాయత్రి షాక్ అయింది.

“అంటే… ఆమె నిన్ను బ్లాక్‌మెయిల్ చేసిందా?”

“అవును.”

“మరి నువ్వు?”

“నేను ఆమెను పెళ్లి చేసుకోవడం కాదు… ఆమె నుంచి అందరినీ కాపాడాలని నిర్ణయించుకున్నాను.”

గాయత్రి అయోమయంగా చూసింది.

“అందరినీ అంటే?”

విరాన్ష్ తన ఫోన్‌లో ఒక పాత మెసేజ్ తెరిచాడు.

“ఆమె నన్ను మాత్రమే కాదు… నా ఫ్రెండ్ రోహిత్‌ని కూడా బెదిరించింది. అసలు ఆ వీడియోలో రోహిత్ గురించి ఉన్న విషయం బయటికి వస్తే అతని జీవితం నాశనం అయ్యేది.”

గాయత్రి నిశ్శబ్దంగా వింటోంది.

“అందుకే నేను అందరి ముందు అన్వితతో గొడవ పెట్టుకున్నట్టు నటించాను. ఆమెను వదిలేసినట్టు చేశాను. కానీ అసలు నిజం… నేను ఆమెకు ఒక షరతు పెట్టాను.”

“ఏంటి ఆ షరతు?”