New Katha Varnika is now on Google Play — read original stories on your phone. Learn more
ಒಲವಿನ ಸೆರೆ – 4

ಒಲವಿನ ಸೆರೆ – 4

 

ಕುಮಾರ್ ಅವರು ರಾಜಶೇಖರ್ ಅವರಿಗೆ ಮುಂದಿನ ರಾಜಕೀಯ ಭವಿಷ್ಯಕ್ಕಾಗಿ ಕ್ಯಾಬಿನೆಟ್ ಮಿನಿಸ್ಟರ್ ಜಗದೀಶ್ ಅವರ ಜೊತೆ ವೈಯಕ್ತಿಕ ಸಂಬಂಧ ಬೆಳೆಸುವಂತೆ ಸಲಹೆ ನೀಡಿದ್ದರು. ಅವರು ಅರ್ಥವಾಗದೇ ಏನೆಂದು ಕೇಳಲು ಸ್ನೇಹ ಸಂಬಂಧ ಬೆಳೆಸುವಂತೆ ಹೇಳಿದ್ದರು. ರಾಜಶೇಖರ್ ಅವರು ಈ ವಯಸ್ಸಲ್ಲಿ ಸ್ನೇಹ ಸಂಬಂಧ ಎಲ್ಲಾ ಕಷ್ಟ ಕುಮಾರ್ ಸುಮ್ಮನೆ ಅನವಶ್ಯಕವಾಗಿ ಏನೇನೋ ಹೇಳಬೇಡಿ ಎಂದು ಅಸಹನೆಯಿಂದ ಹೇಳಲು ನಿಮಗೆ ಸಾಧ್ಯವಾಗದಿದ್ದರೆ ನಿಮ್ಮ ಮಗ ಇದಾನಲ್ಲ ಎಂದು ಹೇಳಿದ್ದರು. 

 

ಕುಮಾರ್ ತಮ್ಮ ಮಾತು ಮುಂದುವರೆಸಿದವರು,”ಅಂದ್ರೆ ನಿಮ್ಮ ಮಗನ ಮೂಲಕ ಸಂಬಂಧ ಬೆಳೆಸಿ ಅಂತ ಹೇಳಿದ್ದು ಸರ್…ನಾನು ಏನ್ ಹೇಳ್ತಾ ಇದೀನಿ ಅಂತ ಅರ್ಥ ಆಯ್ತಲ್ವ ಸರ್…” ಎಂದು ಕೇಳಲು ರಾಜಶೇಖರ್ ಅವರು ಗೊಂದಲದಿಂದ,”ಮಗನ ಮೂಲಕ ಸಂಬಂಧ ಅಂದರೆ ಮದುವೆ ಅಂತ ಅಲ್ಲ ತಾನೆ?” ಎಂದು ಕೇಳಿದ್ದರು.

 

ಕುಮಾರ್,”ಸರಿಯಾಗಿ ಹೇಳ್ತಾ ಇದೀರಾ ಸರ್…ಅದನ್ನೇ ನಾನು ಹೇಳೋಕೆ ಹೊರಟಿದ್ದು…” ಎಂದು ಹೇಳಲು ರಾಜಶೇಖರ್,”ಅವರು ಯಾಕೆ ನಮ್ಮ ಸಂಬಂಧ ಬೆಳೆಸುತ್ತಾರೆ ಕುಮಾರ್? ಅವರು ಕೇಂದ್ರದಲ್ಲಿ ಇದ್ದವರು ಅವರಿಗೆ ಸರಿಹೋಗುವ ಸಂಬಂಧವನ್ನೇ ಹುಡುಕಬಹುದು…ನನಗೆ ಇದ್ಯಾಕೋ ವರ್ಕೌಟ್ ಆಗೋ ರೀತಿ ಕಾಣ್ತಾ ಇಲ್ಲ…” ಎಂದು ಹೇಳಿದ್ದರು.

 

ಕುಮಾರ್,”ಯಾಕೆ ಆಗಲ್ಲ ಸರ್? ವಿರಾಟ್ ಸರ್ ಗೆ ಏನ್ ಕಡಿಮೆಯಾಗಿದೆ ಹೇಳಿ? ಅವರನ್ನು ಬೇಡ ಅನ್ನೋಕೆ ಚಾನ್ಸೇ ಇಲ್ಲ…ಅಲ್ಲದೆ ಅವರ ಅಂತಸ್ತಿಗಿಂತ ನಿಮ್ಮ ಅಂತಸ್ತು ಏನು ಕಡಿಮೆ ಇಲ್ಲವಲ್ಲ…ಸದ್ಯಕ್ಕೆ ರಾಜಕೀಯದಲ್ಲಿ ಸ್ವಲ್ಪ ಹೆಚ್ಚು ಕಡಿಮೆ ಇರಬಹುದು…ಮುಂದೆ ಅದೂ ಸರಿ ಹೋಗತ್ತೆ…” ಎಂದು ಆಶ್ವಾಸನೆ ನೀಡಿದಂತೆ ಹೇಳುತ್ತಿರಲು ರಾಜಶೇಖರ್ ಅವರಿಗೂ ಯೋಚಿಸುವಂತೆ ಆಗಿತ್ತು. 

 

ರಾಜಶೇಖರ್,”ಹಾಗಂತೀರ ಕುಮಾರ್…ನೀವು ಹೇಳೋದೇನೋ ಸರಿಯಾಗಿದೆ ಆದರೆ ಅವರು ಒಪ್ಪಲಿಲ್ಲ ಅಂದರೆ ಕಷ್ಟ ಅಲ್ವಾ?” ಎಂದವರು ಇನ್ನೂ ಗೊಂದಲದಲ್ಲಿಯೇ ಇದ್ದರು. ಕುಮಾರ್,”ಯಾವುದಕ್ಕೂ ನೀವು ಒಮ್ಮೆ ಅವರ ಜೊತೆ ಮಾತಾಡಿ ನೋಡಿ…ನನಗನ್ನಿಸುವ ಪ್ರಕಾರ ಅವರು ಖಂಡಿತ ಒಪ್ಪುತ್ತಾರೆ…ಅವರಿಗೆ ಒಬ್ಬಳೇ ಮಗಳು…ಮತ್ತೆ ಬೇರೆ ಮಕ್ಕಳೂ ಇಲ್ಲ…ಮುಂದೆಯೂ ನಿಮಗೆ ಅನುಕೂಲ ಆಗುವಂತಿದೆ…” ಎಂದವರು ರಾಜಶೇಖರ್ ಅವರ ತಲೆಯಲ್ಲಿ ಬೇಡದ ವಿಷಯಗಳನ್ನು ತುಂಬುತ್ತಿದ್ದರು. ಎಷ್ಟೆಂದರೂ ಅದೇ ಅಲ್ಲವಾ ರಾಜಕೀಯ ತಂತ್ರ. ಎಲ್ಲವನ್ನೂ ತಮ್ಮ ಲಾಭಕ್ಕೆ ಅನುಗುಣವಾಗಿ ಯೋಚಿಸುವುದು. ಇಲ್ಲಿ ಇವರು ಮಾಡುತ್ತಿರುವುದೂ ಅದನ್ನೇ. 

 

ರಾಜಶೇಖರ್ ಅವರು ಕುಮಾರ್ ಹೇಳಿದ್ದನ್ನು ಯೋಚಿಸಿ ನೋಡಿದವರಿಗೆ ತಮ್ಮ ಉಜ್ವಲ ರಾಜಕೀಯ ಭವಿಷ್ಯ ಕಣ್ಣು ಮುಂದೆ ಬಂದಿತ್ತು. ಎಲ್ಲವನ್ನೂ ಕೆಲಹೊತ್ತು ಯೋಚಿಸಿದವರ ತುಟಿಯಂಚಲ್ಲಿ ನಗೆಯೊಂದು ಮೂಡಿತ್ತು. 

 

“ಶಭಾಷ್ ಕುಮಾರ್…ನಿಮ್ಮ ತಲೆಯಲ್ಲೂ ಇಷ್ಟು ಒಳ್ಳೆಯ ಪ್ಲಾನ್ ಬರುತ್ತೆ ಅಂತ ನನಗೆ ಗೊತ್ತಿರಲಿಲ್ಲ…ಪ್ಲಾನ್ ಏನೋ ಚೆನ್ನಾಗಿದೆ ಈಗ ನಮಗೆ ಅದು ವರ್ಕೌಟ್ ಆಗುವುದು ಮುಖ್ಯ… ಆದಷ್ಟು ಬೇಗ ಅವರ ಜೊತೆ ಮೀಟಿಂಗ್ ಫಿಕ್ಸ್ ಮಾಡಿ…ಎಲ್ಲವೂ ಆದಷ್ಟು ಬೇಗ ಆದರೆ ಒಳ್ಳೆಯದು…” ಎಂದವರು ಅಲ್ಲಿಂದ ಎದ್ದು ನಡೆದಿದ್ದರು.

 

 §§§§§§§§§§§§§

 

ಇದೆಲ್ಲದರ ಅರಿವಿರದ ವಿರಾಟ್ ಆಫೀಸಿನ ಕೆಲಸದಲ್ಲಿ ವ್ಯಸ್ತನಾಗಿದ್ದ. ಅವನ ಸ್ನೇಹಿತನೊಬ್ಬ ತನ್ನ ಮದುವೆಗೆ ಆಹ್ವಾನಿಸಲು ಆಫೀಸಿಗೆ ಬಂದಿದ್ದ. ಇಬ್ಬರು ಸ್ನೇಹಿತರು ವರ್ಷಗಳ ನಂತರ ಭೇಟಿಯಾದವರು ಮಾತನಾಡುತ್ತಾ ಇದ್ದರು. 

 

ಅವನ ಸ್ನೇಹಿತ,”ನೀನು ಯಾವಾಗ ಮದುವೆ ಆಗೋದು ವಿರಾಟ್? ನಮ್ಮ ಫ್ರೆಂಡ್ಸ್ ಲಿಸ್ಟ್ ಲೀ ನೀನೊಬ್ಬನೇ ಉಳಿದಿರೋದು ಈಗ…ಎಲ್ಲರೂ ನಿನ್ನ ಮದುವೆಯನ್ನೇ ಕಾಯುತ್ತಿದ್ದಾರೆ ಕಣೋ…” ಎಂದು ಹೇಳಲು ವಿರಾಟ್,”ಆಗೋಣ ಬಿಡೋ…ನಾನೇನು ಮುದುಕ ಆಗಿದೀನ? ಅಷ್ಟೊಂದು ಅರ್ಜೆಂಟ್ ಅಲ್ಲಿ ಮದುವೆ ಆಗೋಕೆ? ” ಎಂದು ಹೇಳಿದ್ದ. 

 

ಸ್ನೇಹಿತ,”ಯಾರನ್ನಾದ್ರೂ ಇಷ್ಟ ಪಡ್ತಿದೀಯ ವಿರಾಟ್? ಅಥವಾ ಅರೇಂಜ್ ಮ್ಯಾರೇಜಾ? ಏನ್ ವಿಚಾರ ಮಾಡಿದೀಯ?” ಎಂದು ವಿಚಾರಿಸುತ್ತಿರಲು ವಿರಾಟ್,”ಯಾರನ್ನೂ ಇಷ್ಟ ಪಟ್ಟಿಲ್ಲ…ಆದ್ರೆ ಲವ್ ಮಾಡಿ ಮದುವೆ ಆಗೋ ಆಸೆ ಅಂತೂ ಇದೆ…” ಎಂದು ಹೇಳಿದ್ದ. 

 

“ಅದ್ಯಾಕೆ ಲವ್ ಮಾಡಿಯೇ ಮದುವೆ ಆಗಬೇಕು ಅನ್ನೋ ಆಸೆ…ನಿಜ ಹೇಳಬೇಕು ಅಂದ್ರೆ ನನಗೂ ಮೊದಲು ಲವ್ ಮಾಡಿ ಮದುವೆ ಆಗೋ ಆಸೆಯಿತ್ತು ಆದರೆ ಮನೆಯಲ್ಲಿ ಅದು ಇಷ್ಟ ಇರಲಿಲ್ಲ. ಹಾಗಾಗಿ ಅವರಿಷ್ಟದ ಹುಡುಗಿಯನ್ನೇ ಇಷ್ಟಪಟ್ಟು ಮದುವೆ ಆಗ್ತಾ ಇದೀನಿ…” ಎಂದು ತನ್ನ ಕಥೆಯನ್ನು ತೆರೆದಿಡಲು ವಿರಾಟ್,”ಹಾಗೇ ಆಗಬೇಕು ಅಂತೇನಿಲ್ಲ ಕಣೋ…ಆದರೂ ಲವ್ ಮಾಡಿ ಮದುವೆ ಆದರೆ ಅವಳು ನನ್ನನ್ನ ಇನ್ನೂ ಚೆನ್ನಾಗಿ ಅರ್ಥ ಮಾಡಿಕೊಳ್ಳಬಹುದು ಅಲ್ವಾ? ” ಎಂದವನಿಗೆ ತನ್ನನ್ನು ಅರ್ಥ ಮಾಡಿಕೊಂಡು ಪ್ರೀತಿ ತೋರುವ ಹೆಂಡತಿ ಬರಬೇಕೆಂಬ ಆಸೆ. 

 

ಅವನ ಸ್ನೇಹಿತ,”ಓಹ್ ಹಾಗೆ…ಕೆಲವೊಮ್ಮೆ ಹಾಗೆ ಅನಿಸುತ್ತೆ… ಆದರೆ ನಿನಗೊಂದು ನಿಜ ಹೇಳಲಾ? ನಮ್ಮ ಹಣೆಯಲ್ಲಿ ಬರೆದಿರುವುದನ್ನು ತಪ್ಪಿಸಲು ಯಾರಿಂದಲೂ ಸಾಧ್ಯವಿಲ್ಲ…ಅದಕ್ಕೆ ನಾನೇ ಉದಾಹರಣೆ… ನಾನೂ ಮೊದಲು ನಿನ್ನಂತೆಯೇ ಅಂದುಕೊಂಡಿದ್ದೆ ಆದರೆ ಕ್ರಮೇಣ ನನ್ನ ನಿರ್ಧಾರ ಬದಲಾಯಿತು…ನಿನ್ನ ಲೈಫಲ್ಲೂ ಅಂತಹ ಒಬ್ಬ ಹುಡುಗಿ ಬಂದರೆ ನಿನ್ನ ನಿರ್ಧಾರ ಕೂಡ ಬದಲಾಗಬಹುದು ಯಾರಿಗೆ ಗೊತ್ತು ಅಲ್ವಾ?” ಎಂದಾಗ ವಿರಾಟ್ ಏನೂ ಹೇಳದಾಗಿದ್ದ. ವಿಧಿಯ ನಿರ್ಧಾರದ ಮುಂದೆ ಯಾರ ಇಚ್ಛೆಯೂ ನಡೆಯುವುದಿಲ್ಲ ಎಂಬುದು ಅವನಿಗೆ ಗೊತ್ತಾಗುವುದರಲಿತ್ತು. 

 

“ಓಕೆ ವಿರಾಟ್…ನನ್ನ ಮದುವೆಗೆ ಖಂಡಿತ ಬರಬೇಕು…ಇನ್ನೂ ಒಂದು ತಿಂಗಳು ಇದೆ ಇಷ್ಟು ಬೇಗ ಕರೆಯುತ್ತಾ ಇದೀನಿ ಅಂತ ಮರೆತುಬಿಡಬೇಡ…ಆಫೀಸಿಗೆ ಒಂದಷ್ಟು ದಿನ ಲೀವ್ ಹಾಕಿ ಬಂದಿದೀನಿ…ಆಮೇಲೆ ಮದುವೆಗೆ ಕೂಡ ರಜಾ ಹಾಕಬೇಕು…ಅದಕ್ಕೋಸ್ಕರ ಈಗಲೇ ಕರೆಯುತ್ತಾ ಇದೀನಿ…ಮಿಸ್ ಮಾಡದೆ ಬರಬೇಕು…” ಎಂದು ಆಮಂತ್ರಣ ಪತ್ರಿಕೆ ಕೊಡಲು ವಿರಾಟ್,”ಖಂಡಿತ ಬರ್ತೀನಿ…ಈಗಲೇ ಕರೆದದ್ದು ಏನು ಸಮಸ್ಯೆಯಿಲ್ಲ…ನನಗೂ ಅರ್ಥ ಆಗತ್ತೆ…ಅದರ ಬಗ್ಗೆ ಎಲ್ಲ ಏನೂ ಯೋಚಿಸೋಕೆ ಹೋಗಬೇಡ…” ಎಂದು ಹೇಳಿದ್ದ. 

 

©©©©©©©©©

 

ಅಂದು ರಾತ್ರಿ ವಿರಾಟ್ ತನ್ನ ರೂಮಿನಲ್ಲಿದ್ದ. ಊಟ ಮುಗಿಸಿ ಕೋಣೆ ಸೇರಿದವನು ಮತ್ತೆ ಆಚೆ ಬಂದಿರಲಿಲ್ಲ. ಟೇಬಲ್ ಮೇಲಿದ್ದ ನೀರಿನ ಜಗ್ ಎತ್ತಿಕೊಂಡವನು ಮನೆಯ ಅಡುಗೆ ಮನೆಗೆ ಹೋಗಿ ನೀರು ತುಂಬಿಸಿಕೊಂಡು ಬರುತ್ತಿದ್ದವನಿಗೆ ತಂದೆಯ ಕೋಣೆಯಿಂದ ಕೇಳಿ ಬರುತ್ತಿದ್ದ ನಗು ಕೇಳಿಸಿತು. ಅವರ ನಗು ಕೇಳಿ ಮನಸು ತಡೆಯದೆ ಕೋಣೆಯ ಬಳಿ ಹೋಗಲು ಅವರು ಸಮರ್ಥ್ ಹಾಗೂ ರೋಹಿಣಿ ಅವರ ಜೊತೆ ಕುಳಿತು ನಗುತ್ತಿದ್ದ ದೃಶ್ಯ ಕಾಣಿಸಿತು. ಅವನಿಗೆ ತಿಳಿಯದೆ ಅವನ ಕಣ್ಣಿನಿಂದ ನೀರು ಜಾರಿತು. ಮತ್ತೆ ಅಲ್ಲಿ ನಿಲ್ಲದೇ ತನ್ನ ಕೋಣೆಗೆ ಬಂದವನು ಮಂಚದ ಮೇಲೆ ಕುಳಿತು ಕಣ್ಣು ಮುಚ್ಚಿದ್ದ. ಮುಚ್ಚಿದ ಕಣ್ಣಿಂದ ನೀರು ಹರಿಯುತ್ತಿತ್ತು. ಕಣ್ಣೀರು ಒರೆಸಿಕೊಂಡವನು ಟೇಬಲ್ ಮೇಲಿದ್ದ ಫೋಟೋವನ್ನು ಕೈಗೆತ್ತಿಕೊಂಡಿದ್ದ.  ಅವನು ಚಿಕ್ಕಂದಿನಲ್ಲಿ ತಂದೆಯ ಜೊತೆ ತೆಗೆಸಿಕೊಂಡ ಫೋಟೋ ಅದಾಗಿತ್ತು. ಫೋಟೋದ ಮೇಲೆ ಸವರಿದವನು ಅದನ್ನು ಅದರ ಜಾಗದಲ್ಲಿಯೇ ಇಟ್ಟಿದ್ದ. 

 

ಎದುರಿಗೆ ಗೋಡೆಯ ಮೇಲೆ ಹಾರ ಹಾಕಿ ಇಟ್ಟಿದ್ದ ಫೋಟೋವನ್ನು ನೋಡಿದವನು,”ಲವ್ ಯು ಅಮ್ಮ…ನೀನು ಯಾಕೆ ನನ್ನ ಬಿಟ್ಟು ಹೋದೆ? ನೀನು ಇದ್ದಿದ್ದರೆ ಇವತ್ತು ನಾನು ಇಲ್ಲಿ ಕುಳಿತು ಅಳುವ ಸ್ಥಿತಿ ಬರುತ್ತ ಇರಲಿಲ್ಲ…ಪ್ಲೀಸ್ ವಾಪಸ್ ಬಾ ಅಮ್ಮ…ನೀನು ಇದ್ದಾಗ ಮನೆಯ ರಾಜಕುಮಾರನಂತೆ ಇದ್ದೆ…ಈಗಲೂ ನೋಡುಗರ ಕಣ್ಣಿಗೆ ಹಾಗೆಯೇ ಕಾಣೋದು…ಆದರೆ ಒಳಗಿನ ನೋವು ಏನಂತ ನನಗೆ ಮಾತ್ರ ಗೊತ್ತಮ್ಮ…ಆಫೀಸ್ ಮನೆ ಇಷ್ಟೇ ಪ್ರಪಂಚ ಆಗಿಬಿಟ್ಟಿದೆ…ಪ್ರೀತಿಯಿಂದ ಮಾತಾಡುವವರು ಇಲ್ಲ…ಊಟ ಮಾಡಿದ್ಯಾ? ತಿಂಡಿ ಮಾಡಿದ್ಯಾ? ಅಂತ ವಿಚಾರಿಸುವವರು ಇಲ್ಲ…ನಾನು ಮನೆಯಲ್ಲಿ ಇದ್ದರೂ ಇಲ್ಲದೆ ಇದ್ದರೂ ಯಾರಿಗೂ ಗೊತ್ತೇ ಆಗಲ್ಲ ಅಮ್ಮ…ಡ್ಯಾಡ್ ಕೂಡ ಹಾಗೇ ಇರ್ತಾರೆ ಅಮ್ಮ…ಅವರಿಗೆ ಅವರ ರಾಜಕೀಯ ಜೀವನವೇ ಹೆಚ್ಚಾಗಿಬಿಟ್ಟಿದೆ…ಅವರಿಗೆ ಇನ್ನೂ ಒಬ್ಬ ಮಗ ಇದ್ದ ಅನ್ನೋದೇ ಮರೆತು ಹೋಗಿದೆ…ಎಲ್ಲೋ ಅವರ ಬ್ಯುಸಿ ಲೈಫ್ ಅಲ್ಲಿ ಸಮಯ ಸಿಕ್ಕಾಗ ಒಮ್ಮೆ ಮಾತಾಡ್ತಾರೆ…”

 

“ಕೆಲವೊಮ್ಮೆ ಯಾರೂ ಬೇಡ ನಾನು ಒಂಟಿಯಾಗಿ ಇದ್ದುಬಿಡಬೇಕು ಅಂತ ಅನಿಸಿದರೂ ಹಾಳಾದ ಮನಸು ಕೇಳಲ್ಲ ಅಮ್ಮ… ಏನ್ ಮಾಡಲಿ ಹೇಳು? ಮನಸಲ್ಲಿ ಇರೋದನ್ನ ತೋರಿಸಿಕೊಳ್ಳದೆ ಇರೋದಕ್ಕೆ ಎಲ್ಲರಿಗೂ ನಾನು ಅಹಂಕಾರಿ ಕೋಪಿಷ್ಟನಂತೆ ಕಾಣಬಹುದು…ಆದರೆ ನನ್ನೊಳಗೆ ಇರುವ ನೋವಿಗೆ ಸಾಕ್ಷಿ ನೀನೊಬ್ಬಳೇ ಅಮ್ಮ….ನೀನೊಬ್ಬಳೇ” ಎಂದು ಬಡಬಡಿಸಿದವನು ಮಂಚದ ಮೇಲಿದ್ದ ಹಾಸಿಗೆಯಲ್ಲಿ ಅಡ್ಡಾಗಿದ್ದ. 

 

ಮಂಚದ ಮೇಲೆ ಮಲಗಿದವನು ಕೋಣೆಯ ಸುತ್ತಲೂ ನೋಡಲು ಮೂಲೆ ಮೂಲೆಯಲ್ಲೂ ಅವರ ಶ್ರೀಮಂತಿಕೆ ಎದ್ದು ಕಾಣುತ್ತಿತ್ತು. ರಾಯಲ್ ಸೋಫಾ, ಚಂದದ ಕಬೋರ್ಡ್, ಗೋಡೆಗಳ ಮೇಲೆ ಕೆತ್ತಲಾದ ಪುರಾತನ ಶೈಲಿಯ ಚಿತ್ರಗಳು, ಎತ್ತರದ ಮೇಲ್ಛಾವಣಿಯಲ್ಲಿ ಚಿನ್ನದ ಕೆತ್ತನೆ ಎಲ್ಲವನ್ನೂ ನೋಡಿದವನು ವಿಷಾದವಾಗಿ ನಕ್ಕಿದ್ದ. ಅವನಿಗೆ ಶ್ರೀಮಂತಿಕೆ ಅಧಿಕಾರ ಎಲ್ಲಕ್ಕಿಂತ ಪ್ರೀತಿ ವಾತ್ಸಲ್ಯವೇ ಅವಶ್ಯಕವಾಗಿತ್ತು. ಇದೆಲ್ಲವೂ ಆಡಂಬರದಂತೆ ತೋರತೊಡಗಿತ್ತು. ಆದರೆ ಅವನಿಗೆ ಅವಶ್ಯವಾದ ಪ್ರೀತಿ ಮಮತೆ ಅಲ್ಲೆಲ್ಲೂ ಕಾಣುತ್ತಿಲ್ಲ. ಕಣ್ಣು ಮುಚ್ಚಿ ಮಲಗಿದವನು ನಿದ್ರಿಸಲು ಪ್ರಯತ್ನಿಸಿದ್ದ. ತಲೆಯಲ್ಲಿ ಸುಳಿಯುತ್ತಿದ್ದ ಆಲೋಚನೆಗಳು, ಹಳೆಯ ನೆನಪುಗಳು ಅವನನ್ನು ಮಲಗಲು ಬಿಡುತ್ತಿಲ್ಲ. ಅವನ ಎದೆಯಲ್ಲಿ ದೊಡ್ಡ ಕೋಲಾಹಲವೇ ಸೃಷ್ಟಿಯಾಗಿತ್ತು. 

 

©©©©©©©©©

 

ಅಂದು ರಾಜಶೇಖರ್ ಸೂರ್ಯವಂಶಿ ಅವರಿಗೆ ಜಗದೀಶ್ ಕಶ್ಯಪ್ ಅವರ ಅಪಾಯಿಂಟ್ಮೆಂಟ್ ಸಿಕ್ಕಿತ್ತು. ರಾಜಶೇಖರ್ ಅವರು ಕುಮಾರ್ ಹೇಳಿದ ವಿಷಯವನ್ನು ಅವರ ಜೊತೆ ಹೇಗೆ ಪ್ರಸ್ತಾಪಿಸಬೇಕು ಎಂದು ಯೋಚಿಸುತ್ತಿದ್ದರು. ಬೆಳಿಗ್ಗೆ ಹತ್ತು ಗಂಟೆಗೆ ಅವರ ಆಫೀಸಿನಲ್ಲಿ ಮೀಟಿಂಗ್ ಫಿಕ್ಸ್ ಆಗಿತ್ತು. 

 

ರಾಜಶೇಖರ್ ಅವರು ನಿಗದಿತ ಸಮಯಕ್ಕಿಂತ ಹತ್ತು ನಿಮಿಷ ಮೊದಲೇ ಕುಮಾರ್ ಜೊತೆ ಹೋಗಿ ಕಾಯುತ್ತಿದ್ದರು. ತಮ್ಮ ಕೆಲಸ ಆಗಬೇಕೆಂದರೆ ರಾಜಕೀಯದವರು ಹೇಗೆ ಏನು ಬೇಕಾದರೂ ಮಾಡಬಲ್ಲರು! 

 

ಜಗದೀಶ್ ಅವರ ಪಿಎ ಬಂದು ಒಳಗೆ ಕರೆದಿದ್ದ. ಇವರು ಒಳಗೆ ಹೋಗುತ್ತಿದ್ದಂತೆ ಜಗದೀಶ್ ಅವರು ಗೌರವದಿಂದ ಮಾತನಾಡಿಸಿದರು. ಮೊದಲೇ ಪರಿಚಯವಿದ್ದ ಕಾರಣ ಇನ್ನಷ್ಟು ಸುಲಭವಾಗಿ ಮಾತನಾಡಲು ಸಾಧ್ಯವಾಯಿತು. 

 

ಜಗದೀಶ್ ಅವರು,”ಹೇಳಿ ರಾಜಶೇಖರ್ ನನ್ನಿಂದ ಏನು ಸಹಾಯ ಆಗಬೇಕು ಅಂತ? ನನ್ನಿಂದ ಆದಷ್ಟು ಖಂಡಿತ ಮಾಡಲು ಪ್ರಯತ್ನ ಮಾಡ್ತೀನಿ.” ಎಂದು ಹೇಳಿದರೆ ಇವರಿಗೆ ತುಸು ಧೈರ್ಯ ಬಂದಿತ್ತು. 

 

ರಾಜಶೇಖರ್ ಅವರು ರಾಜಕೀಯ ವಿಷಯದ ಬಗ್ಗೆ ಮಾತನಾಡಿದವರು,”ಕೆಲವು ಪಕ್ಷದವರು ನಮ್ಮ ವಿರುದ್ಧ ಪ್ರಚಾರ ಮಾಡ್ತಾ ಇದಾರೆ ಎನ್ನುವ ಬಗ್ಗೆ ಮಾಹಿತಿ ಸಿಕ್ಕಿದೆ…ನೀವು ನಮ್ಮ ಪರವಾಗಿ ಏನಾದರೂ ಸಹಾಯ ಮಾಡಬಹುದಾ? ನಿಮ್ಮ ಬೆಂಬಲದ ಅಗತ್ಯ ನಮಗೆ ಈಗ ಬಹಳ ಇದೆ…” ಎಂದು ವಿನಂತಿ ಮಾಡುವ ಹಾಗೆ ಹೇಳಿದ್ದರು. 

 

ಜಗದೀಶ್ ಅವರು,”ಖಂಡಿತ ನನ್ನ ಸಹಾಯ ನಿಮಗೆ ಇದ್ದೇ ಇರತ್ತೆ…ನಿಮ್ಮಂತ ನಾಯಕರ ಅವಶ್ಯಕತೆ ನಮ್ಮ ರಾಜ್ಯಕ್ಕೆ ಇದೆ…” ಎಂದು ಆಶ್ವಾಸನೆ ಕೊಟ್ಟಿದ್ದರು. 

 

ಕುಮಾರ್ ಅವರು ವಿಷಯ ಹೇಳಿ ಎನ್ನುವಂತೆ ರಾಜಶೇಖರ್ ಅವರಿಗೆ ಸನ್ನೆ ಮಾಡಲು ಅವರು ಹೇಳ್ತೀನಿ ಎಂಬಂತೆ ಕಣ್ಣು ಮುಚ್ಚಿದ್ದರು. ರಾಜಶೇಖರ್,”ಜಗದೀಶ್ ಅವರೇ ನೀವು ತಪ್ಪು ತಿಳಿದುಕೊಳ್ಳಲ್ಲಾ ಅಂದರೆ ನಿಮ್ಮನ್ನ ಒಂದು ಮಾತು ಕೇಳಬಹುದಾ? ” ಎಂದು ಪರೋಕ್ಷವಾಗಿ ಪೀಠಿಕೆ ಹಾಕಿದ್ದರು. 

 

ವಿರಾಟ್ ಬದುಕಿನಲ್ಲಿ ಹೊಸ ಅಧ್ಯಾಯ ಶುರುವಾಗಲಿತ್ತು. ಮುಂದೆ ಬರುವ ದಿನಗಳು ಅವನ ಪಾಲಿಗೆ ನೋವಿನ ದಿನಗಳಾಗಿಯೇ ಇರುವುದೇ ಅಥವಾ ಇಷ್ಟು ದಿನ ಅನುಭವಿಸಿದ ನೋವಿಗೆ ಅವಳಿಂದ ಮುಕ್ತಿ ದೊರೆಯುವುದೇ? ವಿಧಿಯ ನಿರ್ಧಾರ ವಿರಾಟ್ ಬದುಕನ್ನು ಬದಲಾಯಿಸಲು ಪಣ ತೊಟ್ಟಂತೆ ಇತ್ತು. 

 

 

ಮುಂದುವರೆಯುವುದು…

 

ಕಥೆ ಓದಿ ನಿಮ್ಮ ಅಭಿಪ್ರಾಯ ತಿಳಿಸಲು ಮರೆಯಬೇಡಿ. ನಿಮ್ಮ ಒಂದೊಂದು ವಿಮರ್ಶೆಯೂ ಕೂಡ ಕಥೆ ಬರೆಯಲು ಪ್ರೇರಣೆ. ನಿಮ್ಮ ಅಭಿಪ್ರಾಯಗಳನ್ನು ಕಾಮೆಂಟ್ ಮಾಡಿ ತಿಳಿಸಿ…

 

ವಿರಾಟ್ ಮನದಲ್ಲಿ ಇರುವ ನೋವಿಗೆ ಮದ್ದೇ ಇಲ್ಲವಾ? ಅವನ ಪ್ರೀತಿಸಿ ಮದುವೆಯಾಗುವ ಆಸೆಗೆ ರಾಜಶೇಖರ್ ಅವರು ಬೆಲೆ ಕೊಡುತ್ತಾರಾ? ಅಥವಾ ತಮ್ಮ ರಾಜಕೀಯ ಜೀವನದ ಭವಿಷ್ಯದ ಬಗ್ಗೆ ಯೋಚಿಸುತ್ತಾರಾ? ನಿಮ್ಮ ಅಭಿಪ್ರಾಯಗಳನ್ನು ಕಾಮೆಂಟ್ ಮಾಡಿ ತಿಳಿಸಿ 🙏 

 

ನಿಮ್ಮ ಪ್ರೋತ್ಸಾಹ ಹಾಗೂ ಚಂದದ ಪ್ರತಿಕ್ರಿಯೆಗಳ ನಿರೀಕ್ಷೆಯಲ್ಲಿ…